Vísað er til fréttatilkynninga dags. 22. maí, 3. júní, 16. júní og 15. júlí 2025 þar sem kom fram að tiltekin skilyrði samkvæmt kaupsamningi hefðu verið uppfyllt vegna kaupa Orkunnar IS ehf. („Orkan“), á hlutafé í Samkaupum hf. („Samkaup“). Í dag voru félögin Samkaup og Atlaga ehf. (áður Heimkaup) sameinuð lögformlega Þá fór fram uppgjör á kaupsamningi Orkunnar við fyrrum hluthafa Samkaupa. Hluthafar Samkaupa fengu afhenta 582.548.510 hluti í Dröngum hf. ("Drangar") eða því sem nemur 28,7% hlutafjár, gegn afhendingu 98,6% hlut í Samkaupum. Í kjölfar uppgjörsins stendur öðrum hluthöfum Samkaupa til boða að selja sína hluti á sömu kjörum í skiptum fyrir hlutafé í Dröngum. Einnig er Dröngum heimilt að innleysa hlut annarra hluthafa í Samkaupum í samræmi við ákvæði hlutafélagalaga.

Samhliða uppgjöri viðskiptanna tóku Drangar við hlutafé í Samkaupum, Orkunni og Lyfjavali. Drangar verða því móðurfélag samstæðunnar eiga félögin að öllu leyti.

Í stjórn Dranga hf. voru kjörin þau Jón Ásgeir Jóhannesson, Magnús Ingi Einarsson, Liv Bergþórsdóttir, Garðar Newman og Margrét Guðnadóttir. Jón Ásgeir verður stjórnarformaður félagsins. Forstjóri Dranga er Auður Daníelsdóttir, en hún hefur starfað sem forstjóri Orkunnar frá árinu 2022  og kemur til með að sinna því starfi áfram samhliða starfi sínu fyrir Dranga.

Stærstu hluthafar Dranga eru: SKEL fjárfestingafélag hf. 68,3%, Kaupfélag Suðurnesja svf. 15,0%, Birta lífeyrissjóður 5,3%, Festa lífeyrissjóður 2,9%, Kaupfélag Borgfirðinga svf. 2,8% og Norvik hf. með 2,5%.

Velta þeirra félaga sem nú mynda Dranga var um 75 milljarðar kr. árið 2024. Í viðskiptunum er lagt til grundvallar að virði hlutafjár (e. equity value) Dranga sé 19,3 milljarðar kr. og heildarvirði án leiguskuldbindinga (e. enterprise value) sé 27,3 milljarðar kr.

Frá því Samkeppniseftirlitið heimilaði framkvæmd samruna félaganna í júní sl. hefur verið unnið að því að bæta og styrkja rekstur Samkaupa, bæta innkaup og einfalda og hagræða í rekstri. Sú vinna er á áætlun.

Í haust verður hlutafé Dranga aukið. Samstæðan hefur ráðið fyrirtækjaráðgjöf Íslandsbanka hf. sem umsjónaraðila verkefnisins og fyrirtækjaráðgjöf Fossa fjárfestingarbanka hf. sem söluráðgjafa. Gert er ráð fyrir að fjárfestakynningar hefjist í byrjun september. Útboð hlutafjár er sölutryggt af Íslandsbanka hf. að fjárhæð 2 milljarða króna.

Hluthafar Dranga ætla að skrá félagið á skipulegan verðbréfamarkað fyrir árslok 2027.

Nánari grein verður gerð fyrir viðskiptunum í kynningu með uppgjöri SKEL fyrir fyrri hluta ársins þann 14. ágúst nk.

Ráðgjafar SKEL og Orkunnar í samrunaferlinu voru Fossar fjárfestingarbanki hf. og BBA//Fjeldco.

Frekari upplýsingar veitir Ásgeir Helgi Reykfjörð Gylfason forstjóri SKEL í gegnum tölvupóstfangið fjarfestar@skel.is