Samtök atvinnulífsins (SA) fyrir hönd Eimskips og Sjómannafélag Íslands (SÍ) hafa gert með sér samkomulag vegna hafnarverkafólks í Sundahöfn. Með undirritun samkomulagsins er boðuðu verkfalli SÍ sem hefjast átti 26. maí 2026 aflýst.

Samkomulagið felur í sér að viðræðum um gerð kjarasamnings er frestað til 31. október 2026 meðan unnið er að hæfnigreiningu hafnarstarfa. Friðarskylda gildir á tímabilinu.

Samhliða er hafist handa við innleiðingu á formlegu hæfnilaunakerfi fyrir hafnarverkafólk. Kerfið mun byggja á hlutlægri greiningu starfa þar sem hæfni, færni og ábyrgð starfsfólks skapar grundvöll fyrir skilvirkari launasetningu og skýrari launaþróun. Fræðslumiðstöð atvinnulífsins mun annast röðun starfa í hæfniþrep á grundvelli íslenska hæfnirammans.

Miðað er við að innröðun í nýtt kerfi verði lokið fyrir 25. október næstkomandi.

Viðræður vegna bátsmanna og háseta á eigin skipum félagsins hafa ekki enn skilað árangri.