Vísað er til tilkynningar Íslandsbanka  er birt var 28.maí sl., þar sem Íslandsbanki óskaði eftir samrunaviðræðum við Kviku banka hf. (Kvika). Stjórn Kviku hefur nú hafnað samrunaviðræðum við Íslandsbanka á þeim grundvelli að upplegg Íslandsbanka endurspegli ekki undirliggjandi virði Kviku að mati stjórnar Kviku.
 
Íslandsbanki hefur gefið út að bankinn hafi til skoðunar ytri vöxt og hafi verið með ýmsa möguleika til skoðunar til að nýta umfram eigið fé í bankanum. Þá er Íslandsbanki þeirrar skoðunar að frekari samþætting á fjármálamarkaði muni leiða til mikillar virðisaukningar fyrir hluthafa bankans, viðskiptavini og hagkerfið allt.
 
Bankinn mun taka afstöðu stjórnar Kviku til nánari skoðunar, meðal annars í samhengi við önnur tækifæri bankans til sóknar og hagsmuni hluthafa Íslandsbanka þar að lútandi.