Eimskip: Afkoma annars ársfjórðungs 2026

Helstu atriði í afkomu annars ársfjórðungs

Tekjur á öðrum ársfjórðungi námu 225,4 milljónum evra og jukust um 23,1 milljón evra eða 11,4% frá sama tímabili í fyrra. Tekjuvöxturinn skýrist einkum af hærri alþjóðlegum flutningsverðum, hækkun olíuverðs og sterku magni, auk þess sem sérverkefni höfðu jákvæð áhrif á alþjóðlega flutningsmiðlun á fjórðungnum.

• Tekjur í siglingakerfinu jukust um 9,9 milljónir evra eða 10,2% en flutningsmagn dróst saman um 2,4% á tímabilinu. Almennt var magn tengt Íslandi sterkt þrátt fyrir minni útflutning tengdum iðnaði.
• Tekjur í alþjóðlegri flutningsmiðlun jukust um 13,6 milljónir evra eða 21,2%, drifið áfram af auknu magni, hærri alþjóðlegum flutningsverðum og nokkrum vel heppnuðum sérverkefnum á fjórðungnum.
• Tekjur í annarri flutningstengdri þjónustu héldust stöðugar. Afkoman var studd af miklum umsvifum í landflutningum og hafnarstarfsemi þrátt fyrir að minnkun í magni hafi haft áhrif á vöruhús og kæligeymslur.

Rekstrarkostnaður nam 204,1 milljón evra og jókst um 23,0 milljónir evra eða 12,7% milli ára. Hækkunin skýrist fyrst og fremst af áhrifum geopólitískrar spennu í Mið-Austurlöndum sem leiddi til hærri olíukostnaðar, hærri alþjóðlegra flutningsverða, aukins kostnaðar í landflutningum ásamt hærri skipaleigukostnaði. Olíukostnaður félagsins hækkaði um 5,7 milljónir evra eða 52,7% milli tímabila þrátt fyrir 5,8% minni olíunotkun. Þá hækkaði ETS-kostnaður um 0,9 milljónir evra þar sem innleiðingarhlutfall ETS fór úr 70% í 100% í byrjun árs 2026.

EBITDA á öðrum ársfjórðungi nam 21,3 milljónum evra og var óverulega hærri en á sama tímabili í fyrra. Neikvæðra áhrifa að fjárhæð um 0,7 milljón evra gætti vegna verkfalls sjómanna á fjórðungnum.

Jákvæð áhrif fjölbreyttra aðgerða síðustu misseri eru áætluð um 13 milljónir evra á ársgrundvelli. Þar af raungerðust 3,2 milljónir evra á öðrum ársfjórðungi með 2,7 milljóna evra jákvæðum áhrifum á EBITDA.

Hlutdeildarfélög skiluðu góðri afkomu sem nam 3,4 milljónum evra.

Vilhelm Már Þorsteinsson, forstjóri

„Rekstur annars ársfjórðungs gekk vel og þrátt fyrir krefjandi rekstrarumhverfi sáum við betri árangur í grunnrekstri félagsins en við höfum séð undanfarna ársfjórðunga. Tekjur jukust um 11,4% milli ára og EBITDA nam 21,3 milljónum evra sem var sambærilegt við sama tímabil í fyrra.

Ófriður í Mið-Austurlöndum hefur haft veruleg áhrif á flutningageirann líkt og marga aðra atvinnuvegi sem sést fyrst og fremst í gegnum miklar hækkanir á olíuverði, hækkun á verði annarra aðfanga og röskun á alþjóðlegum flutningsleiðum. Til að mynda hækkaði eldsneytiskostnaður félagsins um 53% milli ára. Þrátt fyrir þetta tókst að bæta afkomu félagsins sem rekja má til viðbragða við hækkandi kostnaði og þeirra aðgerða sem hófust á síðasta ári til að bæta rekstur félagsins sem fólst meðal annars í aukinni skilvirkni og fækkun stöðugilda.

Það er hins vegar áhyggjuefni ef þær forsendur sem kjarasamningar byggja á standast ekki enda er stöðugleiki á vinnumarkaði lykilforsenda fyrir samkeppnishæfni Íslands og áframhaldandi verðmætasköpun í íslensku atvinnulífi.

Sterkur útflutningur sjávarafurða, eldisfisks og vöxtur í útflutningi á vatni frá Íslandi studdi vel við gámasiglingakerfi félagsins sem vó að hluta til á móti minni flutningi tengdum stóriðju. Alþjóðleg flutningsmiðlun skilaði bættri afkomu meðal annars vegna aukins magns og vel heppnaðra flutninga tengdum sérverkefnum og þá skilaði önnur flutningatengd starfsemi einnig góðum árangri á fjórðungnum.

Við höldum áfram að fjárfesta í framtíð félagsins og þar sem af er ári höfum við fjárfest fyrir um 20 milljónir evra. Innleiðing nýs sölu- og þjónustukerfis fyrir gámasigingakerfið er langt komin og mun skapa aukin tækifæri til sjálfvirknivæðingar, gervigreindarlausna og bættrar þjónustu við viðskiptavini. Á næstu vikum verður tekin fyrsta skóflustungan af nýrri dreifingarmiðstöð á Selfossi og endurbætur standa yfir á dreifingarmiðstöð okkar í Reykjavík. Nýlega var tekin í notkun ný kæli- og frystigeymsla í Árósum og í Rotterdam jukum við þjónustuframboð okkar og bættum nýtingu í vöruhúsi með uppsetningu á kæli og frystiaðstöðu.“

Kynningarfundur 26. ágúst 2026

Eimskip býður fjárfestum og markaðsaðilum til fundar þar sem Vilhelm Már Þorsteinsson, forstjóri, og Rósa Guðmundsdóttir, fjármálastjóri, munu kynna uppgjörið. Fundurinn verður haldinn miðvikudaginn 26. ágúst nk. kl. 8:30 í höfuðstöðvum félagsins að Sundabakka 2, 2. hæð. Fundurinn verður einnig sendur út í gegnum fjárfestasíðu félagsins www.eimskip.com/investors. Þar verður útbúinn sérstakur hlekkur áður en fundurinn hefst. Fjárfestum er velkomið að senda spurningar fyrir fundinn á netfangið investors@eimskip.com.

Skjöl og upptaka af fundinum verða aðgengileg á fjárfestasíðu félagsins, www.eimskip.is/investors.